Ea' Candeora

federico.meneghello ha scritto:EA’  CANDEORA

Da eà candeora
de l’inverno semo fora,
ma se piove e tira vento
de l’inverno semo drento.
’Sto antico proverbio fiducia el dava
anche se eà bona stajon ritardava,
intanto neve e bora
ricamava i veri
che no se vedeva fora.
Pianseva i picoi co ai piè ’e bugànse
i grandi butava scataròni sul fogo
pa’ inpissàre ’e speranse:
ché finisse l’inverno cruo za dal doman
co questo al ceo i alsava ’e man
“Pa’ i nostri fioi, Signore, fa’ calcossa
ché qua ghemo esaurìo
de eà passiensa eà scorta.”
Del fredo stufi morti i jera
i desiderava che ritornasse eà primavera
e i pori ossi ingrotuii al soe scaldare
’na volta i casoeàri i somejava a de ’e jassàre,
però chee do bronse
che sul fogoeàro ardeva
eà fameja insieme tegneva:
noni, zii, putei, papà
sercando de stare da eà indiferensa riparà.
A pasto bastava de poenta calda ’na feta
e eà jornata risultava perfeta.
Eà sera ’e mame contava eà fàvoea più bea
i oci iluminà dal tremoìo de eà candèa,
dopo tuti in leto co ’na preghierina
pa’ domandare perdono
e rivare sereni a eà matina.